തനിമ സാംസ്കാരികോത്സവം
ഡിസംബര് 17, 2008
തനിമ സാംസ്കാരികോത്സവം
ഇരിങ്ങാലക്കുട: തനിമ സാംസ്കാരികോത്സവത്തിന് ജനവരി ഏഴിന് കൊടിയേറുമെന്ന് സംഘാടകസമിതി ചെയര്മാന് അഡ്വ തോമസ് ഉണ്ണിയാടന് എം.എല്.എ. അറിയിച്ചു.
സര്ക്കാര്, ടൂറിസംവകുപ്പ്, ജില്ലാ ടൂറിസം പ്രമോഷന് കൗണ്സില്, തദ്ദേശസ്വയംഭരണസ്ഥാപനങ്ങള് എന്നിവയുടെ സഹകരണത്തോടെ ഇരിങ്ങാലക്കുടയില് രൂപവത്കരിച്ച ജനകീയസമിതിയാണ് സാംസ്കാരികോത്സവം സംഘടിപ്പിക്കുന്നത്.
നിയോജകമണ്ഡലത്തിലെ മികച്ച ഗായകനെയും ഗായികയെയും തിരഞ്ഞെടുക്കുന്നതിന്റെ ആദ്യ റൗണ്ട് മത്സരം ഡിസംബര് 23 നും അവസാന റൗണ്ട് മത്സരം 27 നും ഡോണ്ബോസ്കോ ഹൈസ്കൂള് ഇന്ഡോര് സ്റ്റേഡിയത്തില് നടക്കും. 26 ന് മണ്ഡലത്തിലെ ഏറ്റവും പ്രായംചെന്ന വൃക്ഷത്തെ വൃക്ഷമുത്തശ്ശിയായി മന്ത്രി ബിനോയ് വിശ്വം പ്രഖ്യാപിക്കും. ജനവരി 2, 3 തീയതികളില് ഫിലിം ഫെസ്റ്റിവെലും 4 ന് ചെസ് മത്സരവും നടത്തും. 5 മുതല് 9 വരെ ഫുട്ബോള് മത്സരവും 7ന് നടത്തമത്സരവും നടക്കും. 7 മുതല് 18 വരെ ഫ്ളവര്ഷോ, ഭക്ഷ്യമേള, ഷോപ്പിങ് ഫെസ്റ്റിവെല് എന്നിവയും സംഘടിപ്പിച്ചിട്ടുണ്ട്.
ഏഴിന് വൈകീട്ട് 5 ന് മുനിസിപ്പല് മൈതാനത്ത് സാംസ്കാരികോത്സവത്തിന് കൊടിയേറും. 8 ന് സെമിനാര്, 9 ന് സ്മൃതിജ്യോതിപ്രയാണം എന്നിവ നടക്കും. 13 ന് ഘോഷയാത്രയും തുടര്ന്ന് ഏകാത്മകതാപ്രതിജ്ഞയും സമ്മാനവിതരണവും നടക്കും. 14 മുതല് 18 വരെ വൈകീട്ട് കലാപരിപാടികള് നടക്കും.
